العمر المثالى لتدريب كلبك "" + "" معلومات مهم تعرفها قبل التدريب ""

تعتبر الأيام الأولى بعد إقتناء جرو جديد من أصعب الأيام و أهمها .. فهى التى تحدد كيف ستكون العلاقة بينك و بين كلبك طوال عمره


أكمل لغة فصحى ولا أبدأ عامية ؟


أوكى .... عامية






أنا هنا هفترض انك هتقعد الجرو معاك فى شقة .... مش فى جنينة ولا فوق السطوح


أول ليلة للجرو الجديد فى البيت بتكون أصعب ليله بالنسبة ليه وخصوصاً لو جرو صغير و انت لسة آخده من أمه و اخواته
الجرو لو شفته مع أمه و أولاده هتلاقيه بيلعب و بيجرى و يتنطط و تحس انه إجتماعى لأقصى درجة
بس أول لما تاخده عندك البيت تلاقيه لا يحرك ساكناً .. واقف و شكله خايف من كل حاجة ... من كل حاجة
دة طبيعى ... انت من ناحيتك سيبه يشم أركان البيت و ينزل تحت السرير و الكراسى ..
دة بيديله احساس بالأمان شوية فى أول يوم ليه فى بيته الجديد مع صاحبه الجديد اللى هو حضرتك
سيبه براحته خالص
بعد شوية لما تحس انه بدأ يهدى .. حاول تلعب معاه عشان تزيل الرهبة منه .. لما تلعب معاه حاول تكون قاعد على الأرض قريب من مستواه
لأن لو انت واقف هو بيشوفك حاجة كبيرة قوى زى ما تكون مخلوق من المريخ و بيكش منك


لو لقيته جرو خجول و مبيقربش منك إطلاقاً ..
ممكن تقعد على الأرض مديله ضهرك و تمدله ايدك خلف ظهرك و فيها قطعة جبنة نيستون
( دة فى حالة الجراوى الخجولة جداً )


غالباً هيبدأ يقرب منك براحة ... عشان " يستكشفك " .. و بعد لما ياكل الجبنة المثلثات هيبدأ يحس انك مش حاجة شريرة وانه ممكن يآمنلك






بعد لما لعبنا معاه شوية ناخده على المكان اللى هيبقى فى المستقبل الحمام بتاعه ( البلكونة أو الحمام أو أى مكان تانى انت محدده )
ننتظر لما الجرو يقضى حاجته و نطبطب عليه و نحسسه انه عمل حاجة كويسة



مش هتكلم هنا على طرق تغذية الجراء لأن فى مواضيع كتير فى المنتدى مذكور فيها النقطة دى بالتفصيل



هييجى و قت النوم و أنا هنا هفترض انك هتنيم الجرو معاك فى غرفتك ... أول ليلة للجرو بعيد عن أمه و اخواته بتكون فيلم رعب بالنسبة ليه


غالباً هيبدأ يعيط و يصوصو و يطلع كل الأصوات اللى ممكن تتخيلها
هو مش قصده انه يصحيك من النوم ... هو بس بيحاول ينده على اخواته و أمه
هو بيعتقد ان هو تاه منهم و بالتالى بيقعد يعيط و يصوصو على أمل ان هم يسمعوه و يردوا عليه
وطبعأ محدش بيرد عليه و مع ذلك بيفضل يعمل فواصل عياط منفصلة أو متصلة طول الليلة دى
فاعمل حسابك ان أول ليلة مش هتعرف تاخد راحتك فى النوم .. دة شيء طبيعى جداً و كل الجراء بتبقى بالشكل دة فى أول ليلة


المهم عدت الليلة و صحيت و لقيت عياطه بدأ يقل شوية بشوية .. لأنه غالباً بدأ يفقد الأمل ان أمه أو أخواته هيردوا عليه
بس ممكن الموضوع يتكرر فى تانى و تالت ليلة بس مش بنفس الحدة


تانى يوم هتلاقى الجرو بدأ يستكشف البيت بشكل أكبر
هتلاقيه بدأ يعضض فى أى حاجة بيلاقيها فى متناول أسنانه
هى الكلاب معذورة فى النقطة دى لأن الكلاب بتتعرف على الأشياء عن طريق الشم ثم الفم ثم النظر
وانت لو لاحظت الأطفال الرضع هتلاقيهم بيتعرفوا على الأشياء بنفس الطريقة ( عن طريق الفم )
ابنك أو أخوك الصغير اللى فى اللفة اديله أي حاجة و مش هيحطها فى اي مكان غير فمه
على عكس الانسان اللى بيتعرف على الأشياه بالنظر ثم الشم ثم الفم
فتحاول تخليك هادى لو لقيته بيعضض شرابك و قطعه .. هو مش فاهم
بس تقوله كلمة نو أو بس أو لأ بصوت عالى و نبرة صوت فيها غضب
اوع تمد ايدك عليه دلوقتى .... مهما عمل


تفضل دايماً تعرفه نظم و قوانين البيت بالشكل دة
لازم تعرفه من أول يوم ايه المسموح يعمله و ايه اللى مش مسموح
تعرفه ... انه ميعضش رجليك
.. انه ميعضش فى الأحذية والشرابات .. تحطله حاجة تانية يعض فيها ( لعبة أو حاجة جلد انت مستغنى عنها )
..... يبدأ يعرف أوقات الأكل و النوم اللى انت هتحددهاله وتحاول تخلى الأوقات دى ثابتة عشان بتريحك بعدين
الخ ....................


بعد أسبوع من وجوده معاك لو لقيته مبيسجيبش لكلمة نو .. ممكن تخبطه على ضهره .. بس مش خبطة لعب
خبطة تفهمه منها انك متضايق من اللى هو بيعمله .. بس طبعأ خبطة متألموش بأى شكل من الأشكال
لأن هى شعرة بين الخبطة اللى تبينله بس انك متضايق منه و الخبطة اللى ممكن تسببله ألم .. فخلى بالك قوى من النقطة دى
لو خبطه خبطة و ألمته و صرخ تبقى مشكلة بالنسبة ليك
بتبقى دى أول مرة يلاقى عمل شرير منك اتجاهه و بيبقى مش مستوعب قوى ايه اللى بيحصل
بس ممكن ينسهالك لو مكررتهاش
لو كررتها بقى يبقى تسمحلى أهنيك على أذية نفسية كلبك اللى هتبقى صعب قوى تتعالج
لو كررتها كمان اقدر أقولك انك هيكون عندك كلب هتكرهه بعدين ..
كلب جبان أو خجول .. او كلب بيحاول يضايقك بأى شكل و يجرى منك ..
بيتفنن انه يضايقك و أول لما تاخد بالك يطلع يجرى منك
بتبقى متعة بالنسبة ليه


الكلام دة عن تجربة شخصية .. أول كلب ربيته ضربته و لقيت نتيجة مافيش أسوأ منها و اضطريت أبيعه بعد شهرين ..
كنت عايز أتخلص منه حتى لو ببلاش .. و هى طبعأ كانت غلتطى انا لأنى ضربته





__________________________________________________ ______________________________
متى أبدأ بتدريب كلبى على أوامر الطاعة ؟
__________________________________________________ ______________________________



تقدر تدرب كلبك الجديد على تدريبات الطاعة بعد أسبوع أو عشر أيام من وجوده عندك فى البيت
أول لما الكلب ياخد عليك .. مافيش عمر محدد للموضوع .. أول لما الكلب ياخد عليك ابدأ فوراً


بمعنى أول لما الكلب ياخد عليك و يعرف اسمه بتبدأ تدربه تدريبات الطاعة الأساسية
الجرو بيقدر يفهم من عمر شهرين
هو صحيح التدريب مبيبقاش سهل لأن الجرو اللى عنده شهرين بياخد الموضوع على انه لعب
بس بالصبر 3 أو 4 مرات هتلاقيه بيستجيب .
بالمكافأة والصبر الكلب هيستجيب لتدريباتك بشكل عجيب
و طبعأ أحسن مكافأة بالنسبة للكلب هى الحاجة اللى بتنزل معدته ( حاجة ياكلها )



وفيه نظرية الجماعة الغرب بيستخدموها و هى ( Nothing in Life is Free ) بمعنى ان مافيش حاجة فى الدنيا ببلاش
بمعنى ان الكلب مش هياخد منك أى مكافأة أو أكل الا لو عمل حاجة فى المقابل
الجرو الصغير بيقبى شكله جميل و ممكن تضعف لما يبصلك بعنيه و يفتح بؤه و تفضل تديله بسكوت و انت مبسوط بشكله الكيوت
دة هيصعب عليك تدريب الكلب لأنه بياخد على الدلع
لو عايز ياخد بسكوت يبقى لازم يعمل حاجة تستاهل المكافأة ( ينفذ أمر منك مثلاً )
مافيش بسكوت مجاناً



كلمة أخيرة :


حب كلبك هيحبك و يخلصلك فوق ما ممكن تتصور
فاكر المثل اللي بيقول " زى القطط بياكل و ينسى " دى القطط
انما الكلاب على النقيض تماماً .. استحالة تنسى الشخص اللي بيأكلها
و أنا فى رأيى دى أهم ميزة بتميز الكلاب عن القطط
نعم انه الوفاء



.................................................. .................................................. .........................